Монполимет Групп нь анх 1992 онд байгуулагдсан, үйлдвэр, бизнесийн үйл ажиллагаа нь 20 гаруй жил амжилттай явагдаж байгаа “Монголын ТОП-100 аж ахуйн нэгж” байгууллагын нэг юм. Тус Групп нь Дорноговь аймгийн Өргөн сумын нутагт орших Сэнжит Худаг шохойн чулууны ордоо Монцемент үйлдвэрийнхээ эхний дамжлагыг 2015.08.13 өдөр нээх юм.

Монгол улсын эдийн засаг, аж үйлдвэрлэлийн хөгжилд томоохон түлхэц үзүүлж буй уг төслийг Монгол Улсын Хөгжлийн банк болон Европын Сэргээн Босголт Хөгжлийн Банк, Монполимет Группын санхүүжилтээр говийн бүс нутагт, тэр дундаа Дорнын их говьд олборлох салбараас эцсийн бүтээгдэхүүн үйлдвэрлэх, импортыг орлох үйлдвэрийг барьж ашиглалтанд орууллаа.
Орчин үеийн цементийн үйлдвэрийг барих, ашиглалтад оруулах болон цемент үйлдвэрлэлийн шилдэг шинэ технологиудыг нэвтрүүлэхэд Монголын болон олон улсын мэргэжилтнүүдийн туслалцаа дэмжлэгийг авах нь эрсдлийн менежментийг зүй зохистойгоор зохион байгуулж амжилтанд хурдан хүрэх чухал хүчин зүйл юм. Тиймээс Монцемент төсөл нь Франц улсын Лафарж Групп, Их Британи, Австрали, БНХАУ, Швейцари улсуудын салбартаа тэргүүлэгч байгууллага, зөвлөхүүдийн оролцоотойгоор төслийн эдийн засгийн үндэслэл, компанийн нийгмийн хариуцлагын бодлого төлөвлөгөө, төслийн менежмент, үйлдвэрийн үйл ажиллагаа, засвар үйлчилгээний зохион байгуулалтуудыг боловсруулан амжилттай хэрэгжүүлж байна.
Монцемент төслийн тухай:
“Сэнжит худаг”-ийн шохойн чулууны ордод 2010 оноос нарийвчилсан хайгуул, судалгааны ажил хийж, Монгол улсын итгэмжлэгдсэн лабораториудад хийлгэсэн шинжилгээний дүнг баталгаажуулах зорилгоор тоног төхөөрөмж, цемент үйлдвэрлэлээр дэлхийд тэргүүлэгч Германы “Полисиус”, Данийн “ФЛШмит”, Францын “Лафарж”, Швейцарь-БНХАУ-ын хамтарсан “Хуашин цемент” компаниудын лабораториудад шинжилгээ, хагас үйлдвэрлэлийн туршилтыг хийлгэж, дүгнэлт гаргуулсан.
Нарийвчилсан хайгуулын дүнг үндэслэн ордын шохойн чулууны нөөцийг АМГ-ын Эрдэс Баялгийн Мэргэжлийн Зөвлөлөөр батлуулж, олон улсын JORK стандартын дагуу нөөцийг тогтоож үнэлүүлсэн. Нөөцийн хэмжээ нь цементийн үйлдвэрийн хэрэгцээг 170-аас доошгүй жил хангана хэмээн тооцсон.
Уг орд нь ашиглалтын явцад хөрс хуулалтгүй, металлургийн болон цементийн үйлдвэрийн шаардлагыг хангах өндөр чанарын шохойн чулууны арвин нөөцтэйгээрээ онцлог юм.
Монцемент төслийн хүрээнд эх орныхоо хөрсөн дээр Европын стандарт шаардлагад нийцсэн орчин үеийн дэвшилтэт хуурай аргын технологитой, байгаль орчинд ээлтэй анхны ЭКО цементийн үйлдвэр байгуулж байна.

Монцемент үйлдвэр нь:
• Тоосжилт, азот, хүхрийн ислийн ялгаруулах хэмжээ нь Монгол улсын болон Европын стандарт, шаардлагыг хангасан байгаль орчинд ээлтэй технологитой
• Эрчим хүч, түлшний хэмнэлт ихтэй
• Үйлдвэрийн хаягдал дулаан хийг ашиглан 5 мВт хүртлэх цахилгаан үйлдвэрлэх МУ-ын анхны шинэ технологийг нэвтрүүлж байна.
• Ахуйн болон үйлдвэрийн хаягдал усыг цэвэршүүлэн 90% – ийг дахин ашиглах технологитой
Монгол улсын өнөөгийн уул уурхайд түшиглэсэн эдийн засгаас төрөлжсөн эдийн засаг руу шилжих хөгжлийг дэмжсэн, импортыг орлож гадаад валютын урсгалыг дотооддоо барих энэхүү үндэсний үйлдвэрлэл нь орон нутгийн төсөвт хөрөнгө бүрдүүлж, 500 гаруй шинэ ажлын байрыг бий болгож, бүс нутагт үйлдвэр дагасан туслах аж ахуй, жижиг дунд үйлдвэрлэлийг хөгжүүлэх, тэдний орлогын эх үүсвэрийг нэмэгдүүлэх маш чухал ач холбогдолтой юм.
Монцемент төслийн хүрээнд шинээр 280 айлын орчин үеийн тохилог орон сууц, ахуйн үйлчилгээний төв, цэцэрлэг, спорт цогцолбор зэрэг бүтээн байгуулалтууд сүндэрлэн босч Дорноговь аймгийн Өргөн сум одоогийн байгаагаасаа 3 дахин өргөжин тэлэх боломжтой юм.
Цементийн үйлдвэрлэл гэдэг бол маш урт удаан хугацааны туршид үргэлжлэх зуун дамжсан аж үйлдвэрлэл юм. Тиймээс ч Монцемент төслийн хамт олон эх орныхоо сайн сайхан ирээдүй, хөгжил дэвшил, үндэсний бүтээн байгуулалтын төлөө санаа шулуудан хөдөлмөрлөж байгаа нь үнэхээр бахархууштай зүйл билээ.